У ийыште ик эн ончыч лийше событий – тиде аза шочмаш

                        Тыге, ме 2021-ше ийыште илаш тӱҥална. Тудо эртыше ий деч сайрак лиеш манын ӱшаным кучена. Марла кечышот почеш Имне идалык толеш. Тудо 22-шо мартыште гына вийым налеш. Славян календарь почеш Кычкырыше Агытан идалык пура. Тудо 20-шо мартыште пура. А эрвел календарь Ош кӱртньӧ Ӱшкыж идалыкым конда. Тудо шке праваж дене 12-шо февраль гыч пайдаланаш тӱҥалеш. Идалык кеч-могай янлык дене кылдалтше лиеш гынат, У ийыште ик эн ончыч лийше событий – тиде аза шочмаш. Тений У ийын тӱҥалтышыштыже, кум шагат эрталтымек Йошкар-Оласе азам ыштыме пӧртыштӧ ӱдыр йоча шочын. Тудо кум килоат 700 утла грамм нелытан да 52 сантиметр кӱкшытан. Тудым Кристина аваже дене нылымше январьыште мӧҥгышт колтымо. Республикым вуйлатыше Александр Евстифеевын кӱштымыж почеш, Кристина ден ӱдыржым правительствын лӱмжӧ дене перинатал рӱдерын тӱҥ врачше Ирина Виноградова саламлен. Социал вияҥмаш министерстве деч пӧлекым кучыктен. Изи ӱдыр деч вара ик шагат наре жап эртымеке ош тӱняш эше ик патыр эрге толын. Тудын нелытше ныл килоат 890 грамм. Ушештарена: 2020-шо ийыште эн превый эргаш йоча шочын ыле: 53 сантиметран, кум килоат 700 грамман.