Тений икымше январь гыч ава капиталын кугытшо индексироватлалтеш
Тений икымше январь гыч ава капиталын кугытшо 3,7 процентлан индексироватлалтеш. Ынде тудо икымше йочалан 438 тӱжем теҥге лиеш, а кокымшо йочалан 639 тӱжем теҥге. Сертификат дене оксам кучылташ йонан лиеш. Документым вич кече жапыште пуат, а йодмашым ончымаш ик тылзе олмеш 10 кече марте кӱчыкемеш. Сай решенийым луктыт гын, оксам кум паша кечыште кусарат, – воза «Российская газета» да ушештара: 2020-шо ийын 15-ше апрель гыч ава капитал йодмашым возыде, ЗАГС-ын йочан шочмыжо нерген уверже негызеш оформитлалтеш. Ямде сертификат Кугыжаныш полыш порталыште личный кабинетыш пура. Порталыште еҥ регистрироватлалтын огыл гын, тудо ончычсо семынак йодмашым шке пуэн кертеш.