«Гордей» премийым налше- влакын лӱмышт пале лийын

                         Лев Потапов ынде нылымше гана Республикыштына эн сай модшылан шотлалтын. Теҥгече «Гордей» марий профессионал футбол премийым кучыктымо. «Легенда» номинацийыште Александр Гавенкон надыржым аклыме. Тудо Йошкар-Оласе «Спартак» ден «Дружба» футбол командылаште 60-шо ийла мучашыште 70-шо ийла тӱҥалтышыште модын. Тудо 170 матчым эртарен да 12 голым пуртен. Советский район гыч Николай Комаров «Пахарь» номинацийыште статуэткым налын. Тудо районысо «Звезда» командым чумырен, тренер лийын. Параньга районысо Ондропсола гыч 17 ияш Денис Михайлов «Гордейчик» номинацийыште сеҥышыш лектын. Тудым марий футболын ӱшанже семын аклыме. Кызыт Денис Озаҥысе «Рубинын» академийыштыже тунемеш. Татарстанын тӱҥ командыжат тудлан ӱшаным ышта. «Талукын модшыжлан» Нижнекамскысе «Нефтехимикын» защитникше Лев Потаповым шотлымо. Тиде Левын нылымше статуэткыже. Саламлыме церемонийым пӱтынек у пайрем- влак деч вара интернет вотышто ончаш лиеш.