«Кучем дене вашкыл платформа» икымше лектышым ончыктен

                   Марий Элысе «Кучем дене вашкыл платформа» икымше лектышым ончыктен. Республикыштына калыкын обращенийже дене пашам ыштыше федерал проект умбакыже шыҥдаралтеш. Тудын полшымыж дене республикысе калык тургыжландарыше йодышым  онлайн режимыште каласкален кертеш. Тидлан Кугыжаныш полыш сайтыште, тыгак кугыжаныш кучем органлан да верысе самоуправлений органлан официальный  сайтыштышт лӱмын ыштыме «Проблеме нерген каласкалыза» лаштыкым вераҥдыме. Тиде интернет- платформылан кӧра ведомство- влак калык деч уверым налыт веле огыл, йодыштмашым але йӱклымашым эртарен, калыкын темлымашыжым поген кертыт. Вашкылын тыгай форматше обращенийым вашкерак ончаш йӧным пуа. Тудын дене пайдаланыме икымше йыжыҥыште кучем органлаш 150 утла обращений пурен. Калыкым утларакше тӱҥалтыш класслаште тунемше- влакым шокшо кочкыш дене пукшымаш, кундемым тӱзландарыме да медицина йодыш- влак тургыжландарат. «Вашкыл платформа» шкенжым сай велым ончыктен шуктен. Калыкын йодышыжлан вашмутым пуымо жап кӱчыкемын.