Шушаш ийын туныктымо системыште 11 кугу мероприятийым ышташ палемдыме

                 Шушаш ийын республикысе туныктымо системыш миллиард утла теҥге оксам колтымо лиеш. Туныктымо системыште Калыкле проект- влак кышкарыште 11 кугу мероприятийым ышташ палемдыме. Тений ыштыме паша нерген журналист- влаклан туныктыш министр Наталья Адамова ден тудын алмаштышыже- влак каласкаленыт. А тений чынжымак шуко ыштыме. Министерстве «Туныктыш» да «Демографий» калыкле проект- влакым шыҥдарыше кокла гыч иктыже улеш. Нунын кышкарыште икмыняр регионысо проект дене паша шукталтын. Шым  мероприятийым шыҥдараш федерацйын бюджетше гыч миллиард утла теҥгем ойырымо. «Демографий» калыкле проект кышкарыште йоча сад ден школ- влак пашам ышташ тӱҥалыныт, кызыт эше икмыняре чоҥалтеш да шушаш ийын почылтшаш улыт.  Районлаште «Точка роста» 15 рӱдерым почмо, шушаш ийын эше ешаралтыт. У ий гыч школьник- влак ешартыш шинчымашым кванториумлаште налаш тӱҥалыт, але теорий ден практикым иктеш ушат. «Ончыкылыкын туныктышыжо»  проект почеш туныткышо-влакын профессионал мастарлыкыштым вияҥдыме рӱдер ышташ тӱҥалеш. «Кажне йочан сеҥымашыже» проект почеш ешартыш шинчымашым пуаш кум тӱжем утла вер почылтын, 24-ше ий мучаш марте эше тынарак ешаралтшаш.
               Туныктыш министерстве тыгак икшыван еш- влаклан полышым пуа. Консультаций пунктлаште ача-ава- влаклан 30 тӱжем утла умылтарымашым пуымо. Кыдылаш специальный шинчымашым пуышо тӧнгеж- влак пандемийым ончыде, «Самырык профессионал- влак» да «Абилимпикс» конкурслаште таҥасеныт. Пашан кумшо корныжо- Россий Президентын кӱштымашыже- влакым шуктымаш. Тиде школлам олмыктымаш да тӱзландарымаш, тӱҥалтыш класслаште тунемше- влакым шокшо кочкыш дене пукшымаш, классым вуйлатыше- влаклан полшымаш да молат. Ончыкылык 21-ше 23-шо ий- влакланат мероприятий- влак шотышто соглашенийым пеҥгыдемдыме. Шушаш ийын гына 11 кугу мероприятий шыҥдаралташ тӱҥалеш.