Йӱштӧ Кугыза ден Лумӱдыр- влакын парадышт лийын

                  Кодшо кечылаште Звенигово районышто Йӱштӧ Кугыза ден Лумӱдыр- влакын парадышт лийын. Нуно йоча да кугыеҥ- влаклан кугу пайремым пӧлекленыт. Районысо кажне илемыште Йӱштӧ Коча ден уныкажын шке резиденцийышт уло. Ик йӱштӧ кечын нуно иквереш погынаш лийыныт да Рӱдӧ урем, Юлсер мучко таҥ ошкыл эртеныт. Оласе Йӱштӧ Коча районын тӱҥ ёлкыжым ончыктен. Вара тудын йыр мурен- куштен савырненыт, йоча- влакын возен колтымо серышышт дене палдареныт да пӧлек нунын деке миен шуэш манын сӧреныт. Тыгай парад Провой велыште кокымшо гана эртаралтын. Кочан, уныкажын да йомак герой- влакын рольыштым тӱвыра тӧнежлаште пашам ыштыше- влак модыныт.