Тений капитально чоҥымо 12 объектым пашаш колтымо
Тенийсе шым тылзе жапыште республикыштына капитально чоҥымо 12 объектым пашаш колтымо. Нунын коклаште Марий филармоний, Медведевыште йоча сад, вертолёт площадке, кок стадион-площадке, Медведево районышто вӱдым пуымо системым ик оҥгыш ушымаш улыт. Тений чылаже 21 объектым ыштен шукташ палемдыме. Тидын нерген промышленность министр Станислав Крылов калыкле проект- влакым шыҥдарыме йодыш дене эртарыме совещанийыште Республикым вуйлатыше Александр Евстифеевлан увертарен. 20-шо августлан шотлымаште 823 контрактым пеҥгыдемдыме. Тидыже 92 процент лиеш. Тыгеже 18 контрактым ышташ кодын. Оксам ойырымо нерген ойлаш гын, тенийлан калыкле проект- влакым шыҥдараш 9 миллиардат 800 миллион теҥгем палемдыме. Тушечын 61 процентшым але 6 миллиардым кучылтмо. Совещанийыште «Демографий», «Тазалыкаралтыш», «Туныктыш», «Илыме вер да оласе кумдык» проект- влак нерген келгын кутырымо. Республикым вуйлатыше промышленность министрлан калыкле проект- влакым шыҥдарыме жапым чыла министертвылан кузе шуктымыштым терген шогаш кӱштен.