Автобусым виктарыше- влакым тергат

                  Марий Элыште автобусым виктарыше- влакым тергат. 27-ше август марте республикысе корнылаште «Лӱдыкшыдымӧ автобус» оперативно- профилактик операций эрта. Кугыжаныш автоинспекций пашаеҥ- влак водитель- влакын калыкым шупшыктымо правилым шуктымыштым тергат. Молан манаш гын, автобус дене лийше ДТП-н статистикыже куандарыше огыл. Тений гына автобус дене 23 ДТП лийын. Тушто 36 еҥ эмганен, ик еҥ ӱмыр лугыч лийын. ГИБДД-ште ушештарат: автобус водитель- влак правилым тӱрыс шуктышаш улыт. Мутлан, автобус кайыме годым оксам налаш да билетым пуаш, чарнымешке омсам почаш ок лий. Калыкым шындаш да луктын кодаш чарналтышыште гына да автобус шогалмеке гына лиеш.