Социал-влакын профессионал конкурсышт шумлык

Российысе социал пашаеҥ-влакын профессионал мастарыкыштым тергыме конкурсыш вашталтышым пуртат. Сеҥышылан 500 тӱжем теҥгеаш грантым кучыктат. Кокымшо верлан 300 тӱжем теҥгем, кумшо верлан 200 тӱжем теҥгем пуат. Тыгай конкурс кажне ийын эртаралтеш. Специалист-влакын палемдымышт почеш, тачысе саманыште илыш дене тӧр ошкылшо, шке пашаштыже у технологийым моштен кучылтшо социал пашаеҥ-влакым кӱлеш семын палемдыман. Пытартыш жапыште у технологий ешартылтынак шога. Тышке еш диспетчерский-влакым, социальный контрактым, мӧҥгыштӧ тӱрлӧ полшым пуымым пуртыман. Ондак тыгай конкурсышко кугыжаныш организаций-влакын еҥышт веле ушнен кертыныт гын, ынде коммерческий огыл секторышто пашам ыштыше-влакланат йодмашым пуаш лиеш. Марий Элысе социал вияҥмаш министерствын увертарымыже почеш, 2021-ше ийыште конкурсышко 15 номинацийым пуртымо. Тиде неле илыш ситуацийышке логалше йочан еш-влаклан, тазалык шотышто начарын эмганен вияҥше-влаклан комплексный полышым пуымаш, инвалид-йоча-влакын илышыштым мыняр-гынат кушемылемдаш полшышо тӱрлӧ сервисым вияҥдымаш, шоҥгыеҥ-влаклан полшымаш да молат.