Калык- влакын келшымаш пӧртышт ик чырыклан ямде
Калык- влакын келшымаш пӧртышт ик чырыклан ямде. Тудо федерал адресан инвестиций программын ужашыже кышкарыште чоҥалтеш. Тудым тений мартыште нӧлташ тӱҥалме, 2023-шо ий майлан ыштен шуктышаш улыт. Объектын могайрак улмыжо шотышто Марий Элым вуйлатыше Александр Евстифеев тӱвыра министр Константин Иванов дене мутланен. Подрядчик пеш чаплын пашам ышта, графикым ончылтен чоҥа. Тиде пашан ик эн кӱлешан ужашыже- кӧргыжым тӱзландарымаш. Молан манаш гын, Келшымаш пӧрт шуко калык илыман республикылан пеш кӱлешан объект. Сандене Келшымаш пӧртын интерьержым, технике дене пойдарыме да тӱзландарыме пашам министерстве могайракым ужеш? - йодын республикым вуйлатыше тӱвыра министр деч. Тудо вашаштен: кызыт дизайн-проект ышталтеш, могай оборудований лийшаш рашемдалтеш. Тиде объект шуко функциян лийшаш. Икымше пачаш- кӧргыш пурымо ужаш, холл, академический тӱсан лийшаш. Кокымшо пачашыште тоштер кумдык. Кумшышто тӱҥ зал лиеш, 300 еҥлан келыштаралтеш, тӱрлӧ мероприятийым эртараш йӧршӧ лийшаш. Александр Евстифеев ешарен: заседанийлан торжественный зал рӱдӧ олаште кызыт уке, сандене Келшымаш пӧртыштӧ тудо лийшаш. Дизайн-проект шындыме задачылан келшен толеш. Тудо экспертизым эртышаш. Вара ме проект гыч тӱҥ пашаш куснена. У Келшымаш пӧртым чоҥымаш Россий правительствын полшымыжо да оксам ойырымжлан кӧра лийын кертын. Республикым вуйлатыше Михаил Мишустин да Игорь Комаров дене вашлиймаш- влакым эртарен. Тыге кодшо ийын Россий правительствым вуйлатыше 700 миллион теҥге субсидийым ойыраш кӱштымашым пеҥгыдемден. Теве ынде республикым вуйлатыше чоҥымо пашан кузе кайымыж дене палыме лийын. Подряд организацийым вуйлатыше увертарен: подвалын пырдыжшылан гидроизоляцийым ыштыме да шокшемдыме. Икымше пачаш ямде: пырдыжым нӧлтымӧ, монолит колонно- влакым вераҥдыме, галерейын колонныжым, монолит пырдыжым, тошкалтышым ыштыме. Кызыт кокымшо пачаш чоҥалтеш, кок башенный кран да 35 еҥ тырша. Ик йодмаш гына, каласен Евстифеев: график почеш каеда гынат, паша темпым иземдыман огыл, тиде федерал проект, посна решенийым элнан премьер- министрже приниматлен. Чоҥымо пашам да дизайным Марий Элым вуйлатыше сайлан шотлен.