Школ- влакым приниматлыме жап лишемеш
Йошкар-Олаште кокымшо август гыч школ- влакым приниматлаш тӱҥалыт. Тиде йодышым ола администрацийыште каҥашыме. Кызыт рӱдӧ олаштына 30 тунемме тӧнеж уло. Нуным у тунемме ийлан ямдылымаш тунем пытарымеке вигак тӱҥалын. Нунын материально- технический базышт пеҥгыдемеш, санитар, медицина, гигиена йодыш- влак саемыт, зданий ден теплосеть- влакым олтымо тургымлан ямдылат. Тиддеч посна пӧлемлаште тыгыде олмыктымо паша шукталтеш, тоштемше кӱвар шартыш, омса, окна вашталталтеш. Мебельым ешарен налыт, кок тӧнежыште школ кумдыкым да стадионын асфальт шартышыжым уэмдат, вич вере леведышым ужашын-ужашын тӧрлымӧ, иктыште пищеблок олмыкталтын. «2025-ше ий марте ола округышто туныктымо пашам вияҥдымаш» муниципал программе почеш пищеблок- влакын оборудованийыштым уэмдаш оксам ойырымо. Коронавирус шарлыме жапыште школын пашам ыштыме йӧнжылан кугу тӱткышым ойырымо: термометрым, маскым, перчаткым, антисептикым, дезинфицироватлыше средствам налме. У тунемме ий тӱҥалмылан занятий да перемене, столовыйыш коштмо график ышталтеш. Каҥашыме эше ик йодыш- Нолько посёлко гыч йоча- влакым 13-шо школыш шупшыктымо дене кылдалтын. Кызыт школ маршрутын паспортшо ямдылалтеш.