Марий Элым вуйлатыше Александр Евстифеев «Солнышко» йоча интернат-пӧртыш миен

                     Марий Элым вуйлатыше Александр Евстифеев «Солнышко» йоча интернат-пӧртым олмыктымо деч вара тушто илыме йӧным терген. Тушто олмыктымо паша кодшо ий годсек эртаралтын. Кодшо ийын республикын бюджетше гыч ик миллионат пеле теҥгем ойырымо. Тиде окса дене кечывал кочкышым ыштыме залым да производство цехлам олмыктымо. Ынде тушто илыме йӧнжо мӧҥгысӧ дене келшен толеш да йомакысе шӱлышым ушештара: йӧнан мебельым налме, пырдыжыште мультфильмын геройжо- влакым сӱретлыме. Тиддеч посна тушто илыше- влак кочкаш шолташ тунем кертыт. Марий Элым вуйлатыше пӧлемын йӧнан улмыжым палемден, оборудованийын могай улмыж нерген умылкален да вуйын шогышо- влаклан коҥгам вашталташ кӱштен. Тӧнежыште у стеклопакетым шындыме, сантехникым вашталтыме, вӱд да канализаций пуч- влакым рӱдаҥме деч эрыктыме, плиткам оптымо, пырдыжым чиялтыме. Спонсор коридорым олмыкташ полшен, спортзалымат уэмдыме, мебельымат налме. Вияҥаш полшышо оборудованийым налме, МарГУ да художественный училищын студент-волонтёржо- влак спортзалын интерьержым мультипликаций семын сӧрастареныт. Республикым вуйлатышын мутшо почеш, социал тӧнеж- влакым чарныде уэмден шогыман. Тыште тазалык шот дене ойыртемалтше йоча- влак илат. Нунылан кугурак тӱткыш кӱлеш. Мучашлан тудо коллективлан поро пашаштлан тауштен да физиотерапевт приборым да кок тренажёрым пӧлеклен. Йоча интернат-пӧртым 200 еҥлан келыштарыме. Кызыт 170 йоча ила. Нунын кокла гыч 14-ше тулык улыт, 36-шо ача-аван полышыж деч посна кодшо- влак. Чылаштынат уш-акыл шотышто нелылыкышт уло.

Прошлые выпуски