Йошкар-Оласе 10-шо номеран школын стадионыштыжо асфальт шартышым уэмдаш тӱҥалыныт

                 Йошкар-Оласе 10-шо номеран школын стадионыштыжо асфальт шартышым уэмдаш тӱҥалыныт. Кеҥеж мучаш марте корно пашазе- влак куд тӱжем квадрат метр кумдыкым уэмдышаш улыт. Олмыктымо пашам олан мэрже Евгений Маслов ончен лектын. Оласе Погынымаште школлан зданий ден воктелсе кумдыкыштым йыжыҥын- йыжыҥын олмыкташ палемдыме ыле. Программын икымше участникше радамыш 10-шо номеран школ пурен.  Стадион мо дене ойыртемалтеш? Тушто спорт дене кылым тунемше- влак гына огыл, микрорайонышто илыше- влакат кучат. Футбол, баскетбол дене модыт, куржталыт, скандинав коштмашке ушнат. Тыгак ача-ава- влак изи йочашт дене каналташ лектыт, медицина колледжын тунемшыштат тушто занятийым эртарат. Мэрлан школ директорын ойлымыж почеш, куржталме корно деч посна модмо площадке- влакымат пужен ыштат. Пашан акше ныл миллионат 700 тӱжем теҥгеш шуэш. Кодшо ий мучашыште стадионыш ешартыш тул волгыдым пуртымо ыле. Вес ийлан олмыктымо пашан кумшо йыжыҥже тӱҥалшаш. Тунам баскетбол, гранатым кышкыме, кужытыш тӧрштылмӧ площадкылаште разметкым, чарак гоч куржталме, ГТО нормым сдатлыме верым ыштат.