Звенигово оласе хоккеист- влаклан хоккей бортым вераҥденыт

              Звенигово оласе хоккеист- влаклан хоккей бортым вераҥденыт. «Спорт- илышын нормыжо» федерал проектым шыҥдарыме кышкарыште тений федерал бюджет гыч хоккей дене ямдылалташ спорт оборудованийым  да инвентарьым налаш субсидийым ойырымо. Субсидийын кугытшо 25 миллионат 510 тӱжем теҥге лийын. Тушечын 510 тӱжем теҥгежым республикын бюджетше пуэн. Субсидийым «Ий спорт дене спорт школ» налын. Субсидий окса дене вич муниципал образованийыште- Звенигово, Оршанке, Волжский, Параньга районлаште да Волжск олаште хоккей коробко- влакым (бортым) вераҥдыме лиеш. Кызыт Звенигово районышто тиде паша мучашлалтын. Шернур ден Оршанке районлаште ондакырак вераҥдыме. Хоккей борт дене пырля эше сеткан хоккей капкам, мишеньым, коньки пӱсемдыме станокым, шӱдӧ мужыр коньким да инвентарьым коштымо установкым, увер таблом кондымо.