Марий Элым вуйлатыше паша дене Козьмодемьянск олаш миен

                  Марий Элым вуйлатыше Александр Евстифеев паша дене Козьмодемьянск олаш миен. Тидлан амалым эртарыме совещаний пуэн. Тушто стадионым чоҥен пытарыме шотышто да чоҥен пытарыдыме илыме пӧртышто кум еҥын праваштым пӧртылтымӧ нерген ойлымо. Мийыме икымше верже- кужун чоҥалтше вич пачашан 60 пачеран илыме пӧрт лийын. Тушто пачерым налаш чоҥымо годым кум еҥ шке оксажым пыштен. Но тиде пӧртыштӧ пачерым налаш нунын правшт уке. Глава пӧртым чоҥен пытараш кӱштен. Объектым оксала налаш, чоҥен пытараш, оксам пыштыше кум еҥлан оксаштым пӧртылташ кӱлеш манын. Александр Евстифеевын мийыме вес объектше- «Юбилейный» стадион. Тушто шуко функциян площадкым чоҥымо, асфальтым шарыме, саварым ыштыме, баскетбол щит-влакым вераҥдыме. Кодшо ийын апрельыште стадионын кокымшо черетшым ышташ тӱҥалме. Тушто футбол пасу, куржталме корно лийшаш ыле. Но пашам начар шуктымылан кӧра, объектым приниматлыме огыл. Спорт министр ден олан мерже ӱшандарен ойленыт: 30-шо июль марте объектым сдатлен шуктат. Республикым вуйлатыше тыгак «Козьмодемьянск- историйын, экологийын да йӱлан илыше тоштерже» проектым шыҥдарыме паша дене палыме лийын. Тиде проектым Москосо архитектура школ ямдылен, Россий Минстрой сайлан шотлен, Российысе конкурсышто сеҥышыш лектын. Грантше 44 миллион теҥгем эртен. Паша олан ӱлыл ужашыштыже шукталтеш. Сомыл шуко, чыла вашалтшаш да сӧрале лийшаш.