Юриныште корным чоҥымо паша воранен толеш
Юрино районышто тений да вес ийлан олмыкташ палемдыме автомобиль корнылаште паша мучашыш лишемеш. Корным чоҥымо да олмыктымо паша Марий Эл Правительствылан эн ончылно шогышо йодыш. Сандене тургымлан ямдылалтме паша ончылгочак туҥалын. Кызыт тиде сомыл чыла районыштат чолган шукталтеш. Паша дене Юрино районыш мийыме годым республикым вуйлатыше Александр Евстифеев пашан кокла лектышыже дене палыме лийын. Марьино-Юрино корным тений олмыкташ тӱҥалме, план почеш тудым кум ий ыштышаш улыт ыле. Но республикым вуйлатышын пеҥгыдын йодмыж почеш жапым кусарыме. Транспорт министр Александр Герасименкон ойлымыж почеш, палемдыме 25 меҥге гыч 16 уштышыжым олмыктымо. Тыге, вес ийын тудым тичмаш пашаш колтат. Вес ийын шуктышаш пашам тений ыштен пытарыме. Моло ужашыж шотышто конкурсым эртарыме. Тений федерал автокорно чек деке миен шуына. А вес ийын 2023-шо 2024-ше ийласе программым шуктышаш улына,- каласен министр. Юрино посёлкышто тыгак Кочетов уремыште корным олмыктен шуктымо. Тений поселенийын бюджетшылан 9 миллион теҥгем ойырымо. Тиде окса дене рӱдӧ уремын чыла кужытшым кандаш утла меҥге кужытышто олмыктымо. Тений федерал кӱкшытан Угарман- Йошкар-Ола корнын Копорулиха деч Озёрко ял марте ужашыжым 47 меҥгым олмыктымо лиеш. Паша дене мийыме годым Республикым вуйлатыше «Мариэнерго» филиалын директоржо Сергей Хлусов дене вашлийын. Тудо видеоэскерыме системым ончыктен. Система 36 ялым обслуживатла. Александр Евстифеев тыгак аварий лийме годым электроэнергийым налме ешартыш источник- влак нерген йодын. Хлусовын мутшо почеш 86 мобильный генератор уло. Глава тыгак кужун чоҥалтше шуко пачеран пӧртым ончен. Тений тушко шокшым пуэн, умбакыже пашам ышташ тӱҥалыт.