Кокымшо номеран поликлиникым олмыкташ тӱҥалыт

                Йошкар-Олаште кокымшо номеран поликлиникым олмыкташ тӱҥалыт. Тудым уэмдыме паша «Республикыште тазалыкаралтышын икымше звеножым 2021-ше -2025-ше ийлаште уэмдымаш» программе кышкарыште шукталтеш. Кызыт капитально олмыктымо сомыллан проект да смете документацийым ямдылаш электрон аукцион эртаралтеш. Окса республикын бюджетше гыч ойыралтеш. Олмыктымо годым кугу тӱткышым йӱштӧ вӱдым ситарыше магистраль пучым вашталтымылан ойырат. Тыгак лишыл жапыште Пролетар уремысе тротуарым олмыктен пытарат. Тидыже эмлыме верыш коштшо- влакланат йӧнан лиеш. Начар ужшо- влаклан сайын шижаш манын корно гоч вончымо верлаште лӱмын ямдылыме плиткам оптымо.