Марий Элыште икымше технопарк почылтеш

                     Марий Элыште икымше технопарк почылтеш. Кундемыштына икымше «Кванториум» технопарк «Бауман» лицейште лийшаш. Тудо кӱкшӧ технологиян оборудований дене пойдаралтшаш. Тидыже тунемше- влаклан инженер профессийлан тунемаш йӧным ыштышаш. Тиде программым шыҥдараш «Кызытсе школ» регионысо проект полшен. Технопаркым ышташ 21 миллионат 400 тӱжем теҥгем ойырымо. Тушечын 20 миллион утлаже федерал бюджет гыч, 400 тӱжемже республикын казнаж гыч. Кызыт ноутбукым, 3Д принтерым, микроскопым, гидропон установкым, «Ушан теплице» наборым да моло оборудованийымат кондаш тӱҥалме. Тиддеч посна лицей интерактивный панельым, биологий, физиологий, химий, физике дене цифран лабораторийым, фрезер станокым, паятлыше станцийым, робототехнике наборым, антибактериальный боксым налеш. Кызыт лабораторийлан куд кабинетым олмыкташ тӱҥалме, айти-квантум почылтеш. Йоча- влаклан пырля пашам ышташ, шонкалаш посна кугу пӧлем лиеш. Кванториумысо физике, химий, биологий дене занятийлашке республикысе моло школла гычат тунемше- влак коштын кертыт. Тунемше- влаклан ешартыш шинчымашым налашат программе темлалтеш.