Марий Элым вуйлатыше Волжскыш паша дене мийымыж деч вара дене икмыняр совещанийым эртарен

                    Марий Элым вуйлатыше Волжскыш паша дене мийымыж деч вара олам социал-экономик велым вияҥдыме йодыш дене икмыняр совещанийым эртарен. Мутлан, Волжск оласе 6-шо номеран школын у зданийжым чоҥымо нерген мутланыме. Школын негызше иктӧр ок шич. Сандене каркасше шелышталтеш, панель да тувыраш плита кокласе шовшо пудырген йога. Эн ончыч вигак олмыктымо пашам ончена, а варажым у зданийым чоҥымо нерген шонена. Волжскышто тыге кутырен келшышна: школ 2012-шо ий годсек аварийныйлан шотлалтеш. Сандене уым чоҥыман, а кызыт иктыше сентябрь марте олмыкташ кӱлеш. Тудо кок-кум ийлан ситышаш. Тиде жапыште проектым чолган ямдылыман. Чоҥымаш министр Михаил Степанов ӱшандарен: олмыктымо пашам 20-шо август марте шуктымо лиеш. Туныктыш министр Наталья Адамова у школлан 825 верлан типовой проектым кучылташ темлен. Волжск ола администрацийым вуйлатышат ешарен. Школ верланыме микрорайон чолган чоҥалтеш. 2016-шо ийыште 380 тунемше лийын гын, 18-ше ийыште- 430, тений 600 йоча парт коклаш шичшаш. Эше кум ийыште 800-ышкат шуын кертеш.                            Совещанийыште тыгак Волжскысо рӱдӧ эмлыме верын азам ыштыме пӧлкажым чоҥымо йодышымат ончымо. Тудым тений январьыште тӱҥалме. Чоҥымаш министрын мутшо почеш, подрядчик задачым тӱрыс ок шукто. Кызыт график деч тылзат пелылан вараш кодмаш уло. Республикым вуйлатыше графикым поктен шуын, пашам умбакыже шуяш кӱштен. Шыжым тудым петырыман контур марте шуктыман да вара шокшышто пашам ыштыман.