Таче редакцийышкына ойган увер пурен

                  Таче редакцийышкына ойган увер пурен. Звенигово район кундемысе кугорнышто автоавариеш Марий Элын сулло артисткыже, радиожурналист Раисия Данилова ӱмыр лугыч лийын. Корно туткар «Звенигово-Шолеҥер- Морко» корнын 48-ше меҥгыштыже лийын. «Лада Калина» ден «ВАЗ-2112» ваш тӱкненыт. Икымше машинаште кум еҥ улмаш. Коктын илыш дене чеверласеныт. Иктыже мемнан ончычсо пырля пашам ыштыме йолташна - Раисия Михайловна.
                    Тудо 1954-ше ий 28-ше июльышто Волжский районысо Корамас кундемеш шочын. Школ деч вара Йошкар-Оласе Палантай лӱмеш музыкальный училищым, вара Крупская лӱмеш Марий педагогический институым тунем пытарен. Тӱҥалтышыште Марий филармонийын «Марий Эл» куштышо ансамбльыштыже мурен. Вара илышыжын кужу ужашыжым мемнан «Марий Эл» ГТРК-ан радио службыштыжо тыршен. Тиде жапыштак мурызо да концертлам устан вӱдышӧ семын чапланен.  Тудын возен кодымо ятыр передачыже марий радион шӧртньӧ шӧрлыкыштыжӧ аралалтеш. Пытартыш жапыште «Марий Эл» радиошто пашам ыштен.
                  Уста артистке, мастар радиожурналист Раисия Михайловна Данилован родо-тукымжылан «Марий Эл» ГТРК-ан коллективше шке чаманымашыжым каласа. Тудын нерген поро шарнымаш мемнан шӱмыштына курымеш илаш тӱҥалеш.

Прошлые выпуски