Кугыжаныш тӱҥ санитар врач посна категорий еҥ- влаклан Ковид ваштареш иммунизацийым эртарыме нерген пунчалым луктын

                 Марий Элын тӱҥ кугыжаныш санитар врачше посна категорий еҥ- влаклан Ковид ваштареш иммунизацийым эртарыме нерген пунчалым луктын. Коронавирус инфекций дене черланыме эпидемиологий ситуацийын начар улмыжлан кӧра, Кугыжаныш тӱҥ санитар врач Светлана Булатова пунчалым пеҥгыдемден. Документ дене келшышын, коронавирус ваштареш профилактике прививкым ужалкалыме сферыште, тӱрлӧ моторлык салонышто, мончаште, физкультура да тазалыкым пеҥгыдемдыме комплекслаште, быт полышышто, тӱшка кочмо верлаште, финанс, почто организацийлаште, транспортышто, туныктымо, тазалыкаралтыш, социал аралтыш, ЖКХ, энергетике, тӱвыра, каныш, йоча рӱдер, театр, кино, спорт пашаште тыршыше, кугыжаныш граждан да муниципал служащий, кучем орган, верысе самоуправлений, 18 ияш деч кугурак тунемше да призывник- влак ыштыктышаш улыт. Прививкым медицина показаний дене ышташ лийдыме еҥ- влак гына огыт шындыкте. Пашам пуышо- влак икымше сентябрь марте 60 процент деч шагал огыл шке пашаеҥыштлан вакцинын икымше компонентше дене прививкым ыштыкташ йӧным ямдылышаш, а 25-ше сентябрь марте кокымшо компонент дене. Пунчал 22-шо июль гыч вийым налын.

              Тиде пунчал почеш Республикым вуйлатыше шке Указышкыже вашталтышым пуртен. Тудын дене келшышын, утларак ямде улмо режим тыгак 9-ше август марте кодеш, тӱшка мероприятийлам эртараш ок лий, маскым чиен коштман, дистанцийым эскерыман. Кугыжаныш санитар врачын пунчалжым шукташлан, республикыште посна категорий еҥ- влаклан обязательный вакцинаций пурталтеш. Палемдыме жапыште прививкым ыштыктыдыме еҥ- влак паша деч кораҥдалтыт да пашадар ок тӱлалт.