Самырык профессионал- влак эше кок медальым сеҥен налыныт

              Самырык профессионал- влак 9-ше калыкле чемпионатын финалжым иктешлыме. Таҥасымаш Уфа олаште эртен. Тудым петырыме годым ӱдыр-рвезе- влакым Российын просвещений министрже Сергей Кравцов ден Башкортостаным вуйлатыше Радий Хабиров саламленыт. Вара уло эл гыч погынышо эн сай самырык профессионал-влакым медаль дене наградитленыт. Нуно столяр да повар паша гыч тӱҥалын, увер технологий да инженер дизайн марте 105 утла компетенцийыште моштымашыштым ончыктеныт. Марий Элын командыже финалыште профессионализмлан эше кок медальым сеҥен налын. Йошкар-Оласе строительный техникум гыч Сергей Сурков кермыч оптымаште, Йошкар-Оласе 12-шо школ да Строительный техникум гыч Святослав Орзаев «кермыч оптымаш- юниор» компетенцийыште сеҥеныт.
               Тиддеч ончыч эше кок студент 2021-шо ийын лектышыже почеш финалыш пуртыдымо компетенций дене иктешлыше таҥасымаште наградым налыныт ыле. Строительно- технологий техникум гыч Разиф Сайфутдинов «Коҥгам лукмо паша» дене, Марий радиомеханический техникум гыч Ангелина Погоровская «Бухгалтер учет» компетенций дене профессионализмлан медальон дене палемдалтыныт. Тыге, тений ныл медальоным сеҥен налме.
                Туныктыш министерствын фотожо.