Чодыра пожар- влакым ончылгоч шижтараш ешарен 11 миллионат 500 тӱжем теҥгем ойырымо
Марий Элым вуйлатыше чодыра пожар- влакым ончылгоч шижтараш да йӧрташ ешарен 11 миллионат 500 тӱжем теҥгем ойырен. Пӱртӱс поянлык министерствылан шийвундым правительствын резерв фондшо гыч пуаш ыштыме. Тидын нерген Александр Евстифеев келшыше распоряженийым пеҥгыдемден. Экологийын могай улмыжым эскераш да вашке гына кӱлеш сомылым шукташ чодыра пожарым шижтарыме да йӧртымӧ оборудованийым налаш, чодыра пожар формированийым, техникым да оборудованийым, связь системым да увертарыме йӧным кучаш окса колталтеш. Тиде шийвундо дене кум мотовездеходым, кусарен коштыктымо 60 радиостанцийым, тӱжем рукавам, вӱдлан 360 ранецым, энцефалит деч аралыше 120 костюмым, тыгак вургемым, йолчиемым да моло кӱлеш ӱзгарым налаш палемдыме.