Районласе эмлыме вер- влак 17 вашкеполыш машинам налыныт

             Александр Евстифеев районласе эмлыме вер- влаклан 17 вашкеполыш машинам пуэн. У машина-влак деч сравочым республикым вуйлатыше Вашке полыш станцийын тӱҥ врачше Валерий Манукянцлан кучыктен. Автомобиль- влакым лу районыш тошто машинам вашталташ колтат. У техникым Звенигово ден Килемар, Куженер ден Марий Турек, Медведево ден Морко, У Торъял ден Параньга, Шернур ден Советский район налыныт. Марий Элым вуйлатыше палемден: икмыняр ий ончыч ме вашке полышым пуымаште ӧрдыж аутсорсинг компанийлан эҥертена ыле. Тидыже пеш кугу нелылыкым да лӱдыкшым луктын. Пашам радамын виктарымылан кӧра 2019-ше ийыште тиде йодышым виктарен колтымо. Тудо ийыштак вашке полыш станцийын зданийжым капитально олмыктымо, единый диспетчер службын пашажым ворандарен колтымо.
               2017-ше ий гыч чылаже 104 вашке полыш машина толын, 24 ФАП-ым чоҥымо, 15 куснылшо медицина комплексым налме, 350 кызытсе жаплан келшыше медицина оборудованийым вераҥдыме. Кодшо ийын Козьмодемьянскыште поликлиникым почмо, кызыт Йошкар-Олаште перинатал рӱдерым чоҥымаш, мебель да оборудований дене пойдарымаш мучашыш лишемеш. Волжскышто азам ыштыме пӧрт чоҥалтеш, медицина тӧнеж- влак олмыкталыт. Кызыт пандемий дене кучедалаш кугу вий  да шийвундо ойыралтеш. Александр Евстифеев медицина пашаеҥ- влаклан чаткан пашам ыштымыштлан тауштен ойлен.