Волжск олаште у школым чоҥаш ямдылалтыт

                Волжск олаште у 6-шо номеран школым чоҥаш ямдылалтмаш кая. Проект да смете документацийым ямдылыше организацийымат палемдыме. Аукцион почеш тиде пашалан «Маригражданпроект» акционер ушемым ойырен налме. Ушештарена: кеҥежым зданийым нӧлтымо кум блок гыч иктыжын негызше шаланен ыле. Тушко республикым вуйлатыше Александр Евстифеев шке тергаш миен. Тыгай пудыргымаш ондакат лийын. А 2012-шо ий гыч школым аварийныйлан шотлымо. Тунам ситыдымашым кораҥдаш республикым вуйлатыше вич миллионат пеле теҥге оксам ойырен ыле да тидым палемден: уэш-пачаш олмыктымо дене йодышым кораҥдаш ок лий, у корпусым нӧлтыман. Теве кызыт паша тарванен. Проект да смета документацийым ямдылаш республикын бюджетше гыч куд миллионат 600 тӱжем теҥгем ойырымо. Проект почеш кум пачашан у корпус 825 йочалан келыштарыме лиеш. Тидлан Йошкар- Оласе 31-ше школын проектшым кучылтыт. 6-шо номеран школым кум йыжыҥ дене чоҥаш тӱҥалыт. Смета документацийым шушаш ийын икымше апрель марте ямдылен шуктыман да чоҥымо пашам тӱҥалман.