Йошкар-Олаште лумым чумырымо у вер лийшаш
Йошкар-Олаште лумым луктын кышкыме экологичный верым ышташ шонат. Ола администрацийыште тиде свалкын проектшым ышташ кумылаҥше подрядчикым кычалаш конкурсым увертарыме. Тиде- лумым пытарыме утларак экологичный йӧн лийшаш. Лумым погымо верым Аленкино урем тураште ышташ палемдыме. Тиде кумдыкышто лумым шулыктарыше да очистной сооруженийыш вӱдым йоктарен колтымо установко вераҥдалтшаш. Лумым шулыктымо камерыште бункер лиеш. Тушто ошма ден шӱк-куштыра ойыралт кодеш, а вӱдшӧ эрыкталтеш да йӱр вӱд йогымо канализаций коллекторыш колталтеш, - умылтарат мэрийыште. Пеҥгыде шартышан полигонын кумдыкшо 15 тӱжем квадрат метр лийшаш. Тидыже телым кондымо 230 тӱжем кубометр лумым вераҥдаш ситышаш.
