Спорт – туризм министр сеҥыше спортсмен- влак дене вашлийын
Панкратион кучедалмаш дене Тӱнян Чемпионат ден Первенствыштыже сеҥыше да призёр- влакым саламленыт. Кодшо кечылаште Харьков олаште тиде таҥасымаш эртен. Марий Эл гыч тушко «Рать» клуб гыч ныл спортсменке миен. 61 килограмм марте нелытан юниор- влак коклаште Мария Строкина икымше верым сеҥен налын. Валерия Чепакова ший призёр лийын. Марина Сабанцева ден Вероника Иванова той медалян лийыныт. Теҥгече республикысе спорт-туризм министерствыште министр Лидия Батюкова тренер да спортсмен- влак дене вашлиймашым эртарен. Нуно эртыше таҥасымаш, панкратионым республикыште умбакыже вияҥдыме, Панкратион дене округын Чемпионат ден Первенствыжым шушаш ийын эртарыме нерген мутланеныт. Мучашлан министр тренер ден спортсмен- влаклан шарнымашан пӧлекым кучыктен да у сеҥымаш-влакым тыланен.