Правительстве пӧртыштӧ уржа-сорла тургымын лектышыжым каҥашыме
Правительстве пӧртыштӧ уржа-сорла тургымын лектышыжым каҥашыме. Марий Элым вуйлатыше Александр Евстифеев ял озанлык министр Андрей Кондратенко дене пашаче вашлиймашым эртарен. Тургым мучашлалтын, чылалан лектыш нерген палаш оҥай да шушаш тургымлан кузе ямдылалташым ме раш палышыш улына,- каласен республикым вуйлатыше. Министрын мутшо почеш шошо ага паша чаткан да шке жапыштыже эртен. Кызыт озанлыклаште шыже пасу паша мучашыш лишемеш. Шке жапыштыже кугыжаныш полышым пуымылан кӧра, республике лу тӱжем тонн минерал ӱяҥдышым налын. Тидыже кодшо ийысе деч лу процентлан шукырак. Кӱкшӧ репродукциян урлыкаш пырчым кок тӱжем утла тонным налме. Тидыжат ончычсо ий деч 24 процентлан шукырак. Но чот кукшо да шокшо шогышо игече сай лектышым налаш йӧным ыштен огыл. Пасу пашаеҥ- влак шурным тӱшкан, чулымын погеныт, 23-шо сентябрьлан республикысе озанлык- влак Юл кундем округышто эн ончыч пырчан, пырчан да отызан культурым шийын налыныт. Пырчым ик гектарлан шотлымаште 16 центнер дене 220 тӱжем тонным налме. Но тидыже кодшо ийысе деч 63 процент гына лиеш, - каласен министр. Андрей Кондратенко палемден: кызыт технический культурым погат. 75 процент рапсым поген налме, йытыным кӱрыт, пареҥге ден саскам поген пытарат. Тымарте 46 тӱжем гектареш кокияшым ӱдымӧ, кодшо ий деч ик тӱжемлан шукырак. 101 тӱжем гектар мландым кылмаш куралме. Кодшо ий деч 27 процентлан шукырак. Машинно-трактор паркым уэмдаш озанлык- влак ик миллиард утла теҥгелан 480 техникым налыныт. Марий Элым вуйлатыше ял озанлык министрлан ушештарен: ял озанлык производствылан кугыжаныш полышым умбакыже пуыман.
