Наркотикым шаркалаш тӧчымылан петырыме верыш кая

                  Республикыштына кугу тӱшка дене наркотикым шаркалаш тӧчымылан рвезым судитлыме. Следствий виктемын Йошкар-Оласе пӧлкажын погымо доказательствыжым 18 ияш рвезылан пунчалым лукташ ситышылан шотлымо. Следствий ден суд рашемденыт: тунам 17 ияш рвезе 20 ияш палымыже- влак дене пырля ик килограммат 200 грамм тӱрлӧ наркотикан веществам налын. Йошкар-Оласе пачерыштыже тыгыде пакетлаш оптен.   Кодшо ийын 31-ше июльышто нуно рӱдӧ олаште икмыняр шылтык верым ыштеныт да интернет гоч кушко пыштыме нерген вуйлатышыштлан увертареныт. Туддеч вара наркоконтроль виктемын пашаеҥже- влак нуным кученыт. Пачерыште аралыме, шылтык верлаш оптымо, пеленышт улшо чыла наркотикым поген налме. Судын пунчалже почеш рвезым ныл ият пелылан тӱшка режиман исправительный колонийыш колташ пунчалме. Приговор эше законло вийым налын огыл.