Волжск олаште спорт илышым иктешленыт

               Физкультурникын кечыже лӱмеш Волжск олаште физкультура да спорт пашаеҥ- влакын спортсмен, меценат, мер калык, ола погынымашын депутатше- влак дене пырля совещанийышт эртен. Пытартыш ийлаште Волжскышто спортлан Кугыжаныш, Марий Эл правительстве да республикым вуйлатыше Александр Евстифеев велым кугу полыш пуалтеш. Мутлан, ече роллер трассым, у ФОКОТ-ым, ешартыш ий площадкым да шуко молымат ыштыме. Пандемийым ончыде, оласе 30 тӱжем утла еҥ спорт дене кылым кучен. Тидыже олан пелыже утла калык. Оласе спортсмен- влак байдарке дене иймаште, греко-рим кучедалмаште, чыла стилян каратэ, куштылго атлетикыште, дзюдо, ече дене таҥасымаште кӱкшӧ лектышым ончыктеныт. Ола администрацийын физкультура да спорт пӧлкажым вуйлатыше Сергей Орловын мутшо почеш, бизнесын еҥже- влакат чолган ушнат. Ойыртемалтше спортсмен дене тренер- влак Чап Кагаз да тауштымаш дене палемдалтыныт. Амалкалче- влак окса премийымат пуэныт. Наградым налше- влак коклаште Давид Погосян, Артём Ригов, Артём Гиносян, Ольга Зайцева, Артём Русаков, Лилия Сачкова, Динар Гарифуллин, Ирина Бакуркина улыт. Тыгак мероприятий кышкарыште 35 еҥ ГТО-н шӧртньӧ да ший палыштым налыныт. Тӱҥ шотышто, тиде целлюлоз кагаз комбинатын да электромеханический заводын пашаеҥышт улыт. А комбинатын генеральный директоржо шӧртньӧ пале дене палемдалтын.

Прошлые выпуски