Марий Кугыжаныш филармонийын артистше- влакын ынде шке полатышт уло

                 Марий Кугыжаныш филармонийын артистше- влакын ынде шке полатышт уло. Эртыше кугарнян Яков Эшпай лӱмеш филармонийым торжественно почмо. 80 ий утла филармоний айлыме кумдыклаште пашам ыштен. Шкенжын сценыжым 2014-ше ийыште чоҥаш тӱҥалме. Вара паша чарнен шогалын. Кодшо ийын пашам уэш тӱҥалме. Ик ият пелыште чоҥен шуктымо да пашаш колтымо. Тӱвыра аланлан полшымаш да тудым вияҥдымаш Марий Эл правительствын ик эн тӱҥ задачыже,- каласен Александр Евстифеев. «Тӱвыра» калыкле проект почеш Евсеев лӱмеш тоштерым, Шкетан театрым, Шереметев замкым, Козьмодемьянскысе книгагудым, Волжскысо тоштерым олмыктымо. Тӱвыра колледжын концерт залжым пужен ыштыме, шым ялысе клубым капитально олмыктымо, У Торъялыште модельный книгагудым ыштыме, сымыктыш школ- влаклан семӱзгарым налме. Филармонийыште кызыт вич профессионал коллектив пашам ышта. Тиде «Марий Эл» куштышо ансамбль, «Марий кундем» семӱзгар оркестр, Марий Кугыжаныш капелла, «Эреҥер» калык муро ансамбль да Павел Тойдемар лӱмеш муро театр. Нуно чапле концертым ямдыленыт. Залыш погынышо- влакым сенатор Константин Косачёв, видеокыл йӧн дене Российын тӱвыра министрже Ольга Любимова саламленыт. Пайремыште чоҥышо- влакымат чапландарыме. Медведево ПМК-н автокрановщикше Идрис Габдулхаков «Марий Элын сулло чоҥышыжо» лӱм дене палемдалтын. Каменщик Валерий Иванов ден «Марпромвентиляций» ушемын директоржо Сергей Топоров Правительствын Чап грамотыжым налыныт.