Марий Мер каҥаш Юрий Зайцевым Марий Элым вуйлатышылан сайлымашке лукташ келшен

               Марий Мер каҥаш Юрий Зайцевым Марий Элым вуйлатышылан сайлымашке лукташ келшен. Тыгай решенийым марий общественностьын еҥышт дене Марий Элым вуйлатышын сомылжым шуктышо Юрий Зайцевын вашлиймаште лукмо. Юрий Зайцев каласен: те калыкле тӱвырам аралыше улыда. Сандене  мый тиде мероприятийыш толшаш да тендан дене палыме лийшаш улам манын шонышым. Тендан тӱналтышдам ончаш, каҥашаш да полшаш ямде улам. Тудо тыгак марий калыкын тӱвыражым арален кодымо, яллам вияҥдыме нерген ойлен. Марий мер организаций- влаклан полшаш, туныктымо пашалан, тӱшка увер йӧн- влаклан тӱткышым ойыраш, урем дене зданий- влакым сӧрастарымаште калыкле компонентым кучылташ кӱлеш манын палемден. Ялым вияҥдымаште ФАП- влакым чоҥаш, школ, йоча сад, тӱвыра пӧрт- влакым олмыкташ, корным саемдаш, газым умбакыже пурташ кӱлеш манын каласен. Мер каҥашым вуйлатыше Эдуард Александров Республикым вуйлатышын сомылжым шуктышылан пӱсын шогышо йодыш- влак деке тӱткышым ойырымылан тауштен да Юрий Зайцевым сайлымашке лукмашым поддрежатлен.
             Фото: Марий Элым вуйлатышын организаций да аналитик виктемже.