«Пеледыш пайрем» кугыжаныш статусым налеш

            «Пеледыш пайрем» кугыжаныш статусым налеш. Тидын нерген Марий Элым вуйлатышын сомылжым шуктышо Юрий Зайцев Мер Каҥашын Президиумжо дене вашлийме годым каласен. Мер Каҥашым вуйлатыше Эдуард Александров ушештарен: 2020-шо ийыште марий калыкын 9-ше погынжо эртен да республикыште кугыжаныш калыкле политикым шыҥдарыме нерген каласкален. Мер Каҥаш социал-экономик илышын чыла ужашыштыжат участвоватла. Калыкле пайрем- влакым- Талешке кечым, «Пеледыш пайремым», Республикын кечыжым, Марий тиште кечым эртарымылан кугу тӱткышым ойыра. Мер калык «Пеледыш пайремлан» Кугыжаныш статусым пуаш йодеш. Молан манаш гын, тудо калыкле гына огыл, а калык пайрем. Тудо марий- влакын тӱшкан илыме кундемлам ушен шога, тушко моло калыкын еҥыштат толыт. Марий Элым вуйлатышын сомылжым шуктышо тыгай тӱҥалтышым поддержатлен.
             Российысе марий- влакын федерал калыкле- тӱвыра автономийыштым вуйлатыше Лариса Яковлева йоча- влаклан марий йылме дене учебник- влак огыт сите манын каласен. Юрий Зайцев туныктыш министерствылан тунемме книга- влакым федерал перечньыш пуртымо пашам тӱналаш кӱштен, учебный пособий- влакым электрон форматыш кусараш, йоча савыктыш, марий газет дене журнал- влакым йоча сад ден школлаште шаркалаш, йылмым арален кодаш, тудлан йоча- влакым туныкташ кӱлеш манын.
              Мучашлан Юрий Зайцев вуйын шогышо- влаклан ялыште медициным, корным чоҥымашым, ял озанлык сатум лукшо- влакым, социал полышым пуымашым вияҥдаш задачым шынден, министерстве ден ведомство- влаклан 2024-ше ийысе черетан погынлан ямдалалташ Мер Каҥашлан полшаш кӱштен.
             Фото: Марий Элым вуйлатышын организаций да аналитик виктемже.