Марий Элыште талантан йоча- влаклан полышым пуымо шотышто кӱлешан паша шукталтеш

                  Марий Элыште талантан йоча- влаклан полышым пуымо шотышто кӱлешан паша шукталтеш. Российысе туныктымо паша вияҥме у йыжыҥыш куснен. Тудын рӱдыштыжӧ йоча да тудын моштымашыже улеш. Марий Элыштат уста йоча- влакым виктарыме регионысо модельым ыштыме. Туныктыш министерствыште умылтарыме почеш кызыт республикыште 12 лицей, 7 гимназий да вич школ посна предметым келгын туныкта. Тиддеч посна ешартыш шинчымашым пуышо 106 организаций уло. 2009-ше ий гыч «Шуко профилян лицей-интернатыште» уста йоча- влак дене пашам ыштыше рӱдерым почмо. Тушто шанче да шымлыме пашам виктарат. Российыште «Сириус» туныктышо рӱдер пашажым умбакыже шуя. Тудым вуйлатыше тыге ойла: российысе туныктымо системе кажне йочан мом ыштен кертмыжым почын ончыктышаш. Моштымашым вияҥдыше «Сириус» университет элысе ятыр кундемште пашам ышта. Марий Элыште кызытеш тудо уке, но йоча- влаклан тиде чарак лийын огыл. 2019-ше ий гыч 2021-ше ий икымше июнь марте 22 тунемше тиде рӱдерын программыштыже участвоватлен. Нунын кокла гыч ныл еҥже программыш кок гана ушнен. 15 ӱдыр-рвезе «Шанче» программе, 7- «Сымыктыш», нылыт- «Сылнымут усталык» корно дене шуаралтын. Ончыкыжым Марий Эл йоча да самырык- влакын талантыштым пален налме, вияҥдыме да полшымо пайдале системым ышташ шона.