Юрино посёлкышто вашке у транспорт кыл лиеш

                Юрино посёлкышто вашке у транспорт кыл лиеш. Юрино районым социал-экономик велым вияҥдыме тӱҥ задаче- влакым шуктымашым республикысе кучем терген шога. Марий Элым вуйлатыше Александр Евстифеев Юрино район администрацийым вуйлатыше Марина Шихова дене пашаче вашлиймашым эртарен. Ик эн тӱҥ задаче- Марьино- Юрино маршрут дене корным чоҥымаш. Тудын кужытшо 40 меҥгыш погына. Тудым тений да вес ийын тӱрысынек пужен ыштыман. Вара эше Юрино посёлкыш пурымо корным ужашын –ужашын олмыктыман. Эше посёлко гыч Юл эҥерын вес серышкыже переправым ыштыман. Тыге Юрино ден Козьмодемьянскым ушен шогышо транспорт кыл лийшаш. Тиддеч посна стадионым чоҥен шуктыман,- каласен Александр Евстифеев. Район администрацийым вуйлатыше Марина Шихова тидым каласкален: тений Марьино- Юрино корнын 16 меҥгыжым капитально олмыктымо. Посёлкыш пурымо Кочетков уремыште олмыктымо паша мучашлалтеш. Тачысе кечылан ик меҥгат пеле кужыт уремым норматив марте шуктымо. Инвестор Юл эҥерын пурла ден шола сержым ушаш кумылаҥын. Кызыт Юрино велым ме паромым вашлияш умде улына. Ынде Сумки села воктене причал чоҥалтеш. У транспорт кыл районлан вияҥаш йӧным пуа. Ятыр жап райрӱдыштӧ стадион уке ыле. Тудым кодшо ийын чоҥаш тӱҥалме. Пашан акше- 23 миллион теҥге. Тачысе кечылан стадионым пашаш налме. Повесткыш Юрино посёлкышто кужун чоҥалтше 39 пачеран пӧрт шотышто йодышымат пуртымо. Тудым 63 процентлан ыштен шуктымо. Посёлкышто 30 ий утла шуко пачеран пӧртым нӧлтымӧ огыл. Пытартыш объектым 1995-ше ийыште чоҥаш тӱҥалме. Тымарте  ыштен шукташ йӧн лийын огыл. Кызыт тудым муниципал погыш кусарыме. Республикым вуйлатыше эше ик объектеш шогалын- Шереметев замкым олмыктымо пашаш. Кодшо ийын тушко шокшым пуртымо. Теле гоч келшыше температура кучалтын, аварийный ситуаций лийын огыл. Тудым умбакыже олмыктымо шотышто йодмашым федерал рӱдерыш колтымо.