Марий Элыште тӱҥ федерал инспектор у Торъял посёлкышто калыклан приёмым эртарен

Марий Элыште тӱҥ федерал инспектор Павел Волков Юл кундем округышто Россий президентын полномочный представительже Игорь Комаровын кӱштымыж почеш у Торъял посёлкышто калыклан приёмым эртарен. Йодыш- влакым ончымаште район администрацийын да прокуратурын еҥже- влак лийыныт. Верысе калыкым тӱҥ шотышто социал йодыш- влак тургыжландарат. Тиде- яллашке газым пуртымаш, корно, школ автобус- влакын коштмо корно да молат. Ик еҥ посёлкышто физкультура да тазалыкым пеҥгыдемдыме  комплексым чоҥен пытараш полшаш йодын. Тудым 8 ий ончычак чоҥаш тӱҥалме, но ныл ий ончыч петырен шындыме. А калык тудым вуча,- каласен йодшо еҥ. Пурышо чыла йодыш дене умылтарымашым пуымо. Нуным шуктымо йодышым Президентын регионысо приёмныйжо терген шогаш тӱҥалеш. Тиддеч посна тӱҥ федерал инспектор У Торъялысе рӱдӧ книгагудыш миен. Тудо модельный книгагудым ышташлан конкурсышто сеҥышыш лектын ыле. Лишыл жапыште книгагудо муниципал образованийын тӱвыра илышыштыже рӱдӧ вер лийшаш.