Россий Федерацийын ял озанлык министерствыже Марий Элысе ял озанлык производствым кумылаҥдаш 260 миллион теҥгем тӱлен

Россий Федерацийын ял озанлык министерствыже Марий Элысе ял озанлык производствым кумылаҥдаш 260 миллион теҥгем тӱлен. Тиде паша Марий Элым социал-экономик велым вияҥдыме индивидуал программым шыҥдараш субсидийым пуымо нерген соглашений почеш шукталтын. Чылаже 2024-ше ий марте регионлан  ик миллиардат 200 миллион теҥгем ойыраш палемдыме. Тиде окса ял озанлык продукцийым, сырьём да кочкыш сатум лукташ кумылаҥдаш кайышаш. Федерал окса шӧрым пуышо вольыкым, сурт-кайыкым шукырак ашнаш, йытным, урлыкаш пырчым да нӧшмым ыштен налаш, продукцийым перерабатыватлыме пашам вияҥдаш полшышаш. 2024-ше ий марте тыгай кугыжаныш полыш лектышым палынак кугемдышаш. Тидыже республикын кочкыш сату шотышто лӱдкшыдымылыкшым пеҥгыдемдаш, налог парышым кугемдаш, АПК-ште инвестиций чолгалыкым кӱзыкташ, изи агробизнесым вияҥдаш, ялыште у пашаверым ышташ полшышаш.