Марий Элыште «Пушкин карте» у федерал проект тӱҥалын

                Марий Элыште икымше сентябрь гыч «Пушкин карте» у федерал проект тӱҥалын. Тудлан тӱҥалтышым Российын Президентше Владимир Путин ыштен. Республикыштына тиде проект кузе шыҥдаралтеш, тушко могай тӧнеж- влак ушненыт, карте дене кузе пайдаланаш лийме нерген тӱвыра министр Константин Иванов умылтарен. Карте деке кызыт район- влакымат ушена манын тудо. Проектыш тӱжем дене тунемше- влак ушнат. Нуно мероприятийлаш шкетынат, класс денат, студент группо денат миен кертыт. Кӧн кугыжаныш полыш порталыште записьше уло гын, лӱман электрон «Пушкин картым» возыктен кертеш. Кӧн смартфонжо уке, але картым кидышкыже налнеже гын, октябрь гыч Почта Банк гоч йодмашым пуэн кертеш. Икымше йыжыҥыште- 31-ше декабрь марте картыште кум тӱжем теҥге лиеш, а 2022-шо ий гыч вич тӱжемым пыштат. Кажне у ий гыч кугыжаныш самырык еҥын 23 ийым темымешкыже Пушкин картыш оксам пышташ тӱҥалеш. Тиде окса дене тоштерыш, театрыш, галерейыш, филармонийыш, консерваторийыш да моло тӱвыра тӧнежласе мероприятийыш билетым налаш лиеш. Марий Элыште кызытеш 11 кугыжаныш тӧнеж- шым театр организаций да 4 тоштер филиалышт дене ушненыт. Мероприятий- влакын афишышт «Культура.РФ» порталыште вераҥдалтеш.
            Э.Сапаев лумеш театрын фотожо.