Тулым йӧртымаште шагалрак вий кучылталтеш

                Чодыра пожарым йӧртымашке ушымо вий эркын шагалемеш. Волжскыш мийыме деч вара Александр Евстифеев пожар шотышто оперативный штабыш пурен да тушто совещанийым эртарен. Шикшештме верын кумдыкшо 6 гектар кодеш. Тӱҥ вий кум верыште тырша: орола да эҥын кийыше верлам йӧрта. Сӱрет вашталтде шога. Мартын ден Чуркан ер воктенат икгайракак сӱрет. Тыгак лиеш гын, изирак группировкым вес верыш кусарыме лиеш. Республикым вуйлатыше палемден: сай могырыш вашталтыш уло гынат чрезвычайный ситуаций режим аралалт кодеш. Йӧртымаште эше оборона министерствын ик вертолётшо тырша. Тиде жапыштак тул пижмын амалжым шымлат.