Волжскысо 6-шо школ омсажым почын
Теҥгече шинчымаш кечын Республикым вуйлатыше Александр Евстифеев шке сӧрымыжым шуктен, Волжск оласе 6-шо номеран школышто торжественный линейкыште лийын. Школ аварийный улмаш. Но Республикым вуйлатышын ушнымыжлан кӧра, жапыштыже школын негызшым пеҥгыдемдыме да теҥгече тудо тунемше ден туныктышо- влаклан шке омсажым почын. Вуйлатышылан школым, стенд- влакым ончыктеныт. Тудыжо школ лесхозын пашашжлан да тунемше- влакын конкурслаште сеҥымашыштлан пӧлеклалтын. Ятыр выпускник Юлтехыш тунемаш пура, чодырам куштымаште тырша. Александр Евстифеев палемден: лишыл жапыште чодырам шындаш тӱҥалына. Пӱртус министерствым вуйлатышылан увертарем: тек тендан тунемшыда- влакымат тиде пашаш ушат, манын. Республикым вуйлатыше ешарен: Волжскышто школын у корпусшым нӧлтымӧ йодыш каҥашалтеш. Тыгак олаште лийше кӱлешан вашталтыш- влак нерген ойлен. Тидымат увертарен: республикын правительствыже икымше сентябрь гыч бюджет сферыште тыршыше- влаклан пашадарым вич процентлан кӱзыкташ пунчалым луктын. Школ директор Алексей Чирков республикым вуйлатышылан полышым пуымыжлан таум каласен. Чынжымак, школ лунчыргымылан кӧра, икымше сентябрьыште кушко тунемаш каена манын шоненна ыле. Теве ынде йодыш кораҥдалтын, школ штат режим дене пашам ышта. Мучашлан Марий Элым вуйлатыше школ сатум налаш тунемме тӧнежлан сертификатым пӧлеклен.