Йошкар-Оласе Прохоров уремыште магистраль пучым вашталтыме паша мучашлалтын
Йошкар-Олаште «Т Плюс» компаний Прохоров уремыште магистраль пучым вашталтыме пашам мучашлен. Тудо Строитель урем деч 4-ше поликлинике марте 460 метр пучым вашталтен. Тыге оласе калык ӱшанлын шокшо дене пайдаланаш тӱҥалеш. Кызыт олмыктымо верыште кумдыкым тӱзландарат. Йолын коштмо корно- влакым уэш ыштен, асфальт дене леведыт, кудывечыш пурымо корно- влакым тӧрлат, транспорт чарналтышым шке верышкыже пӧртылтат, газоным шотыш кондат. Чылаже 2021-ше гыч 2023-шо ий марте Прохоров уремыште Строитель деч Зелёный урем марте компаний тӱжем метр магистраль пучым вашталташ шона. Пашан тичмаш акше шӱдӧ миллион утла теҥге лиеш.