У Торъял посёлкышто школым капитально олмыктымо пашан кучалтмыже туныктымо пашам чарен ок шогалте

              У Торъял посёлкышто школым капитально олмыктымо пашан кучалтмыже туныктымо пашам чарен ок шогалте. Вес ола гычын аукционышто сеҥыше подрядчик олмыктымо пашам жапыштыже ыштен шуктен огыл. У Торъялысе школын кум пачашан пӧртшӧ тений олмыктымо пашам вучен шуктен. Контракт почеш 13-шо августлан вентиляций да волгенче деч аралалтме, вӱдым ситарыме да йоктарен колтымо, ырыктыме, южтарыме системым ыштышаш, окнам вашталтышаш, леведышым, пищеблокым, санузелым олмыктышаш улыт ыле. Но Владимир оласе компаний палемдыме жапыш пурен огыл. А подрядчикым вашталташ жап кодын огыл, 25-ше августлан пашам мучашлаш кӱштымӧ. Тиде жапат эртен. У Торъял районым вуйлатыше Евгений Небогатиков школым ончен лектын да сентябрь мучко эше паша каяш тӱҥалеш манын. Но йоча- влаклан у тунемме ий жапыштыже тӱҥалеш. Тӱҥалтыш класс-шамыч да 11-ше класс- влак йоча садыште да Немда школышто тунемаш тӱҥалыт. Немда-Обалыш ялыш йоча- влакым автобус шупшыкта. 5-ше гыч 9-ше класс марте тунемше- влак шинчымашым дистанций формат дене налыт. Туныктыш пӧлка ден школ администраций умылтарашлан ача-ава погынымашым эртареныт. Олмыктымо пашам мучашлымым контрольыш налме.
            Район администрацийын фотожо.