Марий Элым вуйлатыше Москошто Российысе чоҥымаш министрын алмаштышыже Никита Стасишин дене вашлийын

           Марий Элым вуйлатыше Москошто Российысе чоҥымаш министрын алмаштышыже Никита Стасишин дене вашлийын. Нуно Российын чоҥымаш, илыме вер да коммунал озанлык министрже Ирек Файзуллинын Марий Элыш толшашыже нерген мутланеныт. Министр республикыш 7-ше сентябрьыште толшаш. Тудо куратор семын республикыште социал- экономик велым вияҥдыме индивидуал программым кузе шыҥдарымым ончаш тӱҥалеш. Программым Правительство председатель Михаил Мишустин тений апрельыште 2024-ше ий марте жаплан пеҥгыдемден. Программе кышкарыште тений 12 мероприятийым ышташ палемдыме. Нунын кокла гыч иктыже- ешартыш оксам ойырен ял озанлык сатум шукырак лукташ кумылаҥдымаш. Тиде лӱштымӧ ушкалым, сурт кайыкым ончымашым, йытыным ончен-куштымашым, кушкыл нӧшмым ыштен налмашым да ял озанлык продукцийым перерабатыватлымашым вияҥдымаш. Тиде пашалан тенийлан 150 миллион теҥге ойыралтын. Субсидийым пуашлан организаций- влакым ойырен налме. Ял озанлык сатум лукшо 16 предприятий дене соглашенийым пеҥгыдемдыме. Тиддеч посна транспорт инфраструктурым проектироватлаш да чоҥаш палемдыме. Тенийлан кум оъектым палемдыме. Тиде Йошкар-Ола аэропортын терминалже, Рӱдӧ оласе автовокзал, Козьмодемьянск ола воктене причал. Тиддеч посна программе кышкарыште Волжск олаште азам ыштыме пӧрт чоҥалтеш.
            Россий чонымаш министерствын фотожо.

Прошлые выпуски