Марий Элым вуйлатыше Российысе калык переписьыште участвоватлен
Марий Элым вуйлатыше Российысе калык переписьыште участвоватлен. Теҥгече Александр Евстифеев «Кугыжаныш полыш» порталысе личный кабинетыште перепись лаштык- влакын анкетысе йодышыштлан вашештен. Икымше гана тидым электрон йӧн дене ышташ лиеш. Тидыже йӧнан да вашке, адакшым пандемий жапыште лӱдкшӧ деч посна процедурым эрташ полша. Калыкым шотлымаш 15-ше октябрь гыч 14-ше ноябрь марте шуйна. Марий Элысе калык тиде мероприятийыш чулымын ушнен. Кугыжаныш полыш порталыште гына 67 тӱжем утла еҥ эртен, а Маристатын ончыктымж почеш чылаже шотлымашке 77 тӱжем еҥ ушнен. Тидыже республикысе калыкын чотшо деч 11 утла процент лиеш.
