Медицина колледжыште остеопороз дене кылдалтше конференций лийын

               Медицина колледжыште шанче-практик конференций лийын. Теҥгече Остеопорозын Тӱнямбал кечынже Йошкар-Оласе медицина колледжыште Юл кундем федерал округысо кыдалаш медицина да фармацевт организаций- влакын студентышт коклаште кудымшо регион- влак кокласе шанче-практик конференций эртен. Тӱҥ докладым Медведевысе рӱдӧ эмлыме верын врач-неврологшо, остеопороз дене Россий ассоциацийын еҥже, республикын сулло врачше Османов ыштен. Остеопороз- луым начаремдыше да тугылтмашке кондышо чер. Элысе 34 миллион еҥ, але 24 процент, тиде чер дене лӱдыкшӧ тӱшкаш пура, 14 миллионжо черле улеш, эше 20 миллионжо чер деке лишем толеш. Остеопорозлан кӧра минут еда 7 тупрӱдӧ тодылалтеш, вич минут еда эрдылу кӱрлеш. 2030-шо ийлан Российыште эрдылу тодылалтмаш 23 процентлан кушкын, талукышто 144 тӱжем случайыш шуын  кертеш. Остеопороз ынже вияҥ манын, изи гычак профилактикым ыштыман: шӧр кочкыш дене ситышым кальцийым налман, Д витамин эре ситыше лийшаш, кӱлеш наре тарванылман, тамак ден аракам кудалтыман, жапыштыже тергымашым эртыман, диагнозым шындымеке, врачын виктарыме почеш гына эмлалтман. Остеопороз кечын колледжын студентше- влак врач дене прогулкыш лектыныт да «Остеопорозлан- уке» мастер-классым эртареныт. «Таза кочкыш- таза лу» видео-рецепт конкурс эртен. Икымше верым Башкортостанын Салават оласе да Мордовийысе Краснослободской медицина колледжлан студентышт пайленыт. Кокымшо верым Бирскысе медико-фармацевт колледжын студенткыже- влак налыныт. Кумшо верыш Саратов областьысе Балаково да Йошкар-Оласе медицина колледжын студентше- влак лектыныт.