Корно пашазе- влакын Йошкар-Ола уремлам 2023-шо ийыште олмыкташ у планышт шочын

               Корно пашазе- влакын Йошкар-Ола уремлам 2023-шо ийыште олмыкташ у планышт шочын. Кугыжаныш закупко сайтыште эше ныл уремым олмыктымо нерген увер лектын. Пашам 2023-шо ийлан палемдыме. Заказчик семын «Муниципал заказын дирекцийже» муниципал тӧнеж шотлалтеш. Тыге шушаш ийын 15-ше апрель гыч икымше август марте рӱдӧ оласе Яков Эшпай уремын Пролетар деч Йошкар Армий урем марте ужашыже олмыкталтшаш. Контарктын тӱҥалтыш акше шым миллионат 100 тӱжем теҥге утла. Вес контарктым 20 миллионат 200 тӱжем утла теҥгелан тиде жапланак Эшпай уремын Йошкар Армий урем деч Ленин проспект марте ужашышлан ыштыме. Орай уремын Водопроводный деч Пролетар урем марте ужашыжым апрель гыч август марте шым миллионат 600 тӱжем утла тенгелан шотыш кондышаш улыт. Зарубин уремын Первомай деч Анциферов урем марте ужашыжым апрель гыч октябрь марте олмыкташ палемдыме. Тидлан 33 миллионат 400 тӱжем теҥге утла окса кайышаш. Тыгак Йошкар Армий уремын Вознесенский деч Машиностроитель урем марте ужашыжым октябрь марте олмыкташ тӱналыт. Тиде пашалан 78 миллионат 800 тӱжем теҥге утла оксам палемдыме. Тӱҥ паша семын тошто асфальтым кораҥден уым шарымаш, канализаций вынем- влакым пужен ыштымаш, бордюр кӱым вашталтымаш, ушнышо корно- влакын тӱҥалтышыштым асфальтироватлымаш да газоным тӧрлымаш шотлалтыт.