Икмыняр калыкле поект дене Марий Эл Российын вич ончыл кундем радамышкыже пурен

                Корным чоҥымо да йӧнан оласе кумдыкым ыштымаш дене Марий Эл Российын вич ончыл кундем радамыш пурен. Кӱкшӧ рейтинг: корным чоҥымаш дене кумшо вер, оласе йӧнан илыме верым ыштымаш дене визымше вер- регионышто инфраструктурым чолган вияҥдыме да корнын качествыжым палынак саемдыме нерген ойла. Республикына тыгак экологий йодышыштат почеш ок код. «Яндар вӱд» федерал проектым шыҥдарыме дене кокымшо вер, «Юл эҥерым тазаҥдымаш» проект дене 6-шо верым налын. Икмыняр калыкле проектым шыҥдарымашын кокла лектышыжым иктешлымаш Кугыжаныш Совет комиссийын, Правительство комиссий Президиумын да Чоҥымаш министерстве коллегийын пырля эртарыме заседанийыштышт лийын. Видеоконференцкыл йӧн дене эртарыме заседанийыште Марий Элым вуйлатыше Александр Евстифеев участвовтален. Россий Правительстве председательын алмаштышыже Марат Хуснуллин палемден: Элнан Президентше Владимир Путин  калыкле цельын икмыняр стратегий задачыжым шынден. Нуным 2024-ше да 2030-шо ий марте шуктыман. Мутлан, идалык еда 5 миллион деч шагал огыл еш илыме вержым саемдышаш, талукышто 120 миллион наре квадрат метр илыме верым чоҥыман. Агломерацийлаште корно сетьын 85 процент инфраструктурыжым наорматив марте шуктыман, регионалсе корнын 50 процентшым 24-ше ий марте норматив дене келыштарыман, а 30-шо ий марте 60 процентым. Марий Элыште кодшо ийын 372 тӱжем наре квадрат метр илыме верым чоҥымо. Тидыже 20-шо ий деч шукырак. Кызыт 61 шуко пачеран пӧрт нӧлталтеш. Федерал проектым шындарыме жапыште 571 тӱшка кумдыкым тӱзландарыме. Кодшо ийын гына 85 кумдык саемын.