Агротуризм Марий Элын визит карточкышкыжо савырнен кертеш

              Агротуризм Марий Элын визит карточкышкыжо савырнен кертеш,- тыге шотла сенатор Сергей Мартынов. Теҥгече Марий Эл Кугыжаныш Погынын черетан сессийже эртен. Тудын пашаштыже сенатор, Федераций Советыште республикын представительже Сергей Мартынов участвоватлен. Сессийлан ямдылалтме годым депутат- влак аграрный туризм нерген йодышымат каҥашеныт. Тиде сферылан кугыжаныш велым полышым пуымо нергенат ойленыт. Марий Эллан тиде кӱлешан йодыш. Республике эре аграрный, ял озанлык дене кылдалтше кундемлан шотлалтеш, -каласен сенатор. Тиде- регионын ойыртемже, тудым кучылташ кӱлеш, бренд лийшаш, Марий Элын шинчалан койшо маркыже. Тӱня мучко ял туризм кызыт шарлен толеш. Республике шке яндар экологийже, ӧрыктарыше пӱртӱсшӧ, курымашлык ял йӱлаже дене турист- влакым кумылаҥден, шупшын шогышо ойыртемалтше вер лийын кертеш,- шотла Сергей Мартынов. Тидлан кызытат шагал огыл ышталтеш. Республикыште ял туризмым вияҥдаш федерал бюджет гычат субсидий ойыралтеш, грант семын, тыгак, «Агротуризм» грант ямдылалтеш. Тиддеч посна Марий Элыште лишыл жапыште агропромышто тыршыше- влаклан пособийым пуымо правилым пеҥгыдемдат- тыгай полышым налын кертше профессий- влакын перечньыштым ыштыме. Федерал структуро дене пырля пашам ыштыше республикысе кучемын тыршымашыже яллан полышым пуымаште , ял озанлыкым у кӱкшытыш нӧлталмаште пеш кӱлешан, - каласен сенатор Сергей Мартынов.