Коммунал озанлык дене кылдалтше йодышым рашемдаш йӧн уло

              28-ше март гыч 1-ше апрель марте Рӱдӧ олаштына илыме вер да коммунал озанлык йодыш дене калыклан приёмым эртарыме арня лиеш. Тудо Дмитрий Медведевын регионысо мер приёмныйыштыжо эрта. 29-ше мартыште 10 гыч 13 шагат марте чоҥымаш, архитектура, илыме вер да коммунал озанлык министр Михаил Степанов ден Икымше ТЭЦ-ым вуйлатыше, «Оласе кумдык» партпроектын координаторжо Игорь Бондарчук деке мияш лиеш. Вес кечынже тиде жапыштак кугыжаныш жилищный надзор департаментым вуйлатыше Эльвира Гамерова ден илыме вер да коммунал озанлык аланыште мер контроль рӱдерым вуйлатыше Наиля Михайлова, мер приёмныйым вуйлатыше Александр Павлов калыкым вучат. 31-ше мартыште 12 гыч 14 шагат марте шке йодышым «Йошкар-Ола» ола округын администрацийжым вуйлатыше, мэр Евгений Масловлан пуаш лиеш. Чыла йодышым 63-00-39 телефон дене рашемдыман.