Инфекций койко шагалемеш
Йошкар-Оласе эмлыме верлаште ковид койкым шагалемдыме. Молан манаш гын, коронавирус дене ситуаций саемаш тӱҥалын. Республикысе тазалыкаралтыш министерствын ончыктымыжо почеш кызыт куд медицина организацийыште 190 койкым кодымо. Стационарлаште 124 еҥ эмлалтеш. Нунын кокла гыч 17-ше нелын черланыше, 60 еҥ кислород полышым налеш, ИВЛ дене кок еҥ пайдалана. Йошкар-Оласе эмлыме вер, сарын ветеранже- влаклан Республикысе клинический госпиталь пӱтынек шке режимышкышт пӧртылыныт. Медицина тӧнежлаште пациент- шамычлан план почеш полыш пуалтеш, диспансеризаций эрта. Но лушкаш ок кӱл маныт тазалыкаралтыш министерствыште. Шанчеҥ- влакын шонымышт почеш ковидын у толкынжо август- сентябрьыште пӧртыл кертеш. Сандене вакцинаций ден ревакцинаций ончычсо семынак кӱлешан улыт. Тачысе кечылан 403 тӱжем утла еҥ прививкым ыштыктен. Тушечын 391 тӱжемже тичмаш курсым эртен.